🛠手套工具箱 - 手套清洗教學及保養

無論你買左對新手套定係打完比賽後，都要將...

🛠手套工具箱 - 手套清洗教學及保養

無論你買左對新手套定係打完比賽後，都要將手套清洗，將乳膠表面污漬清潔，令手套可以發揮最佳狀態。以下呢條片相信可以令大家對洗手套有更深嘅了解。

清洗Q&A
1.) 新手套是否必須清洗？
答: 是！因為每對新手套出廠嘅時候會加入化學物質，令乳膠儲存時減低氧化機會。而化學物質通常係水溶性或粉劑。所以用手接觸乳膠會感受到滑滑嘅感覺。需要透過開手套 (Pre-wash) 將手套乳膠之化學物質溶解，令手套更快進入比賽狀態。

2.) Pre-Wash 一次就得？
視乎乳膠特性，基本上手套Pre-wash 一次就可以。但部分較硬嘅乳膠需要洗多幾次令乳膠變軟。而有部分乳膠落得太多化學物質，所以要多洗一次。

3.) 用咩洗手套？
基本可以使用一條毛巾及手套清潔劑便可。如冇手套清潔劑，可以用洗潔精代替。不過洗潔精容易起泡，只需少量就足夠。而毛巾可選擇纖維較幼之物料（例如: 吸水毛巾）。過份粗糙嘅物料有機會令已損耗乳膠惡化。

4.) 洗手套/開手套流程
1️⃣先用暖水浸泡，並加入手套清潔劑浸泡1-1.5小時。
2️⃣將適量手套清潔劑噴於乳膠表面，以打圈方式清潔乳膠表面。假如清洗已磨損之乳膠，請以溫柔力度清潔。
3️⃣清潔手套背面及其他位置。
4️⃣以清水過走清潔劑，過至冇氣泡便可。
5️⃣以「揸」方式迫出手套水份，請勿扭乾手套，會令乳膠失去彈性。
6️⃣掛上衣架並置於室內自然風乾
7️⃣掛乾後放入透明包裝膠袋，並放於手套袋內。如手套乳膠過黏，請以保鮮紙隔開。

5.) 乾手套需時多久？
一般好天大約需時30 - 48 小時已乾至80-90%，視乎天氣，濕度及空氣流通而定。而春天濕度高，約5日或以上達致全乾。

6.) 手套快乾方法？
如果想快啲乾，要保持空氣流通，令室內產生對流。另一個方法可以將手套放喺風扇前開到最大將手套吹乾。

7.) 不能使用乾手套方法
❌抽濕機
❌太陽直射
❌風筒
❌吸濕大笨象
⭕️冷氣

8.) 是否每次用完手套都要洗？
呢個緊係要啦，因為香港無論你睇硬地，仿草定真草。乳膠都會沾染沙泥，麈埃及污漬等，仲有帶住手套點都會出汗，臭之餘又容易滋生細菌。透過洗手套，將乳膠污漬洗走。令乳膠保持最佳狀態。如果唔洗，除左臭，仲會影響乳膠黏度。對乳膠嘅發揮降低。

9.) 手套乳膠一般可以用幾耐？
視乎自己嘅用法，一般乳膠於開手套後3-6個月能夠發揮最高水平。當然保養嘅方法都好影響乳膠耐用性。之後乳膠狀態開始下滑。而下滑程度視乎乳膠特性。一般一年都已經唔啜，摸上乳膠出現滑滑感覺已經唔啜，咁就一定要買用另一對手套。

10.) 手套需要換有咩訊息？
除左手套乳膠滑滑地，之後乳膠缺乏彈性。特別浸手套全濕後會「Hea」。都係一個要換嘅訊息，提醒你去換對新手套。

11.) 如乳膠黏度降低，可否用手套增黏劑？
都勉強可以嘅，因為手套唔啜，就算你噴左增黏劑，都改變唔到乳膠變壞嘅事實，最多都可以頂到半場波，仲會吸晒啲麈同沙石。買支野都百幾二日。咁不如買過一對新手套仲好啦。

感謝各位耐性睇晒關於手套保養嘅文章。呢個係版主多年心得，希望幫到大家去保養你球場上嘅拍檔。如果有唔明嘅地方，都歡迎各位inbox查詢。如有錯漏，歡迎指正。

#歡迎轉載

---